Бүгүн, олунньу 7 күнүгэр, Нь.С. Тимофеев аатынан Республикатааҕы олимпийскай эрэллэри бэлэмниир спортивнай оскуола чэпчэки атлетика манеһыгар атах оонньууларыгар Саха сирин оҕолорго чемпиона, СР спордун маастара Колесов Семен Семенович сырдык кэриэһигэр IV республикатааҕы оҕолорго атах оонньууларыгар турнир саҕаланна.Күрэххэ Уус Алдантан, Горнайтан, Мэҥэ Хаҥаластан, Чурапчыттан, Хаҥаластан, Дьокуускайтан ДЮСШ-1, Үөһээ Дьааҥыттан, Абыйтан, Өлүөхүмэттэн, Тааттаттан, Үөһээ Бүлүүттэн уонна Дьокуускайдааҕы “Модун” спорт кииниттэн спортсменнар кыттыыны ылаллар.
Билигин 2009-2010 уонна 2011-2012 с.т. уолаттар уонна кыргыттар кылыыга, ыстаҥаҕа, куобахха, үрдүгү ыстаныыга бастыҥы быһаарсыылара саҕаланна.Турнир сүрүн спонсордарынан Семен Колесов бииргэ төрөөбүттэрэ, аймахтара, доҕотторо, 1 Хомустаах дьаһалтата буолаллар. Бириис фондатын уопсай суумата 260 тыһ. солк. тэҥнэһэр.Үөрүүлээх арыллыыга эдэр спортсменнары эҕэрдэлээтилэр, ситиһиилэри баҕардылар: Нам улууһун баһылыгын солбуйааччы Юрий Дьяконов, “1 Хомустаах нэһилиэгэ” тыа сирин түөлбэтин баһылыга Василий Жирков, улуустааҕы саха атах оонньууларын федерациятыттан Дмитрий Стручков, СӨ атах оонньууларыгар спорт маастара, Семен Колесов аҕатын балта Наталья Колесова, күрэх сүрүн судьуйата Николай Кейметинов.Ону сэргэ үөрүүлээх түгэҥҥэ кыттыыны ыллылар: Нам улууһун физическэй култуура уонна спорт управлениетын начальнига Павел Иванов, Нь.С. Тимофеев аатынан республикатааҕы олимпийскай резербэни бэлэмниир спортивнай оскуола директора Василий Винокуров, улуустааҕы саха атах оонньууларын федерациятын салайааччыта Николай Парников, Семен Колесов аймахтара, доҕотторо.Бүгүн сахалыы атах оонньуутугар өрөспүүбүлүкэ кэскиллэрэ, чемпионнара, призердара – кылыыһыттара, ыстаҥаһыттара, куобахчыттара – түмсэн бастыҥ ааты быһаарсаллар. Семен Колесов сырдык кэриэһигэр республикатааҕы атах оонньууларыгар турнир саҕаланыаҕыттан кыттар улуустар, тренердэр сылтан сыл иитиллээччилэрин маастарыстыбаларын чочуйан кылаастарын үрдэтэр сыаллаах-соруктаах кэлэллэр.
Ситиһиилэри баҕарабыт. Бүгүн хас биирдии спортсмен бэйэтин рекордун олохтоотун, көрдөрүүтүн тупсардын.“Нам улууһа” МО пресс-сулууспата
