Намҥа Ил Түмэн норуот депутата Ньургун Тимофеев кэриэһигэр күһүҥҥү кросс буолла.
Улуустааҕы депутаттар Сэбиэтин председателэ Алексей Винокуров, улуустааҕы спорт управлениетын салайааччыта Павел Иванов, Бастакы Хомустаах баһылыга Василий Жирков, Түбэ баһылыга, чэпчэки атлетика федерациятын салайааччыта Григорий Гуляев, күрэхтэһии сүрүн судьуйата Клавдия Шелковникава Ньургун Семенович туһунан истиҥник санаатылар, кыттааччыларга доруобуйаны, кыайыыны баҕардылар.
Күһүҥҥү салгыҥҥа “Эҥсиэли” стадиоҥҥа Чурапчы, Мэҥэ Хаҥалас, Уус Маайа, Таатта, Ньурба, Кэбээйи, Сунтаар, Амма, Бүлүү, Нам улуустарын уонна Дьокуускай куорат 135 спортсмена 500 м, 1000 м, 2000 м, 3000 м, 5000 м дистанцияларга сүүрбүттэрэ. Ону тэҥэ, Эҥсиэли хочотун сиригэр-уотугар ветераннарга 5000 м Благовещенскай куораттан Алексей Кузько күрэхтэспитэ. Бу күн сүүрүүктэр кыайыыга дьулуурдарын бары өттүнэн көрдөрбүттэрэ диэн бэлиэтиибит.
2008-09 сс. кыргыттарга 500 м дистанцияҕа кыайыылааҕынан Чурапчыттан Климентьева Дайаана таҕыста. Иккискэ Намнааҕы 2 №-дээх оскуола үөрэнээччитэ Ширяева Аня уонна үһүскэ Ньургун Тимофеев аат. РСШОР иитиллээччитэ Христофорова Ксюша таҕыстылар.
2008-09 сс. уолаттарга 1000 м кыһыл көмүс мэтээли түөһүгэр Куличкин Айтал (Чурапчы) кэттэ. Үрүҥ көмүс мэтээли Нам сүүрүүгэ Парников Сайдам ылла уонна боруонса мэтээл Драгунов Эрчимэни кытта Чурапчыга айаннаата.
2006-07 сс. кыргыттарга 1000 м бастакы миэстэни Намнааҕы 1 №-дээх оскуолаттан Иванова Джульетта ылла. Иккиһи Жиркова Күннэй (РСШОР) уонна үсүһү Сивцева Аня (Чурапчы) ыллылар.
2006-07 сс. уолаттарга 2000 м барыларын кэннилэригэр хааллартаан Намтан Большошапов Дима (РСШОР) бастакынан кэллэ. Иккиһинэн үчүгэй бириэмэни Жегусов Артем (Чурапчы) көрдөрөр уонна Сивцев Юра (НСОШ №2) үһүс.
Дьахталларга 3000 м кыайыыны күөх Ньурбаттан Вероника Кугданова-Донская сурунна. Иккискэ “Стайер” кулууптан Сардаана Федорова уонна үһүскэ Чурапчытааҕы спорт уонна физическай култуура инстититуттан Дария Чемезова таҕыстылар.
Эр дьоҥҥо 5000 м финишка бастакынан АГАТУттан Айсенбег Черепанов кэллэ. Иккиһинэн уонна үсүһүнэн ЧГИФКИС уолаттара Матвей Попов, Эрхан Михайлов киирдилэр.
Ветеран дьахталларга 3000 м тыалы-кууһу ортотунан сүүрбүттэргэ Мэҥэ Хаҥаластан Елена Бурнашева барыларыттан инники кэллэ. Кини кэнниттэн Яна Егорова (“Стайер” кулууп), Тааттаттан Валентина Доргуева кэллилэр.
Ветеран эр дьоҥҥо күүстээх киирсии кэнниттэн Уус Маайа сүүрүүгэ Дмитрий Ловцев иннин кимиэхэ да биэрбэтэ. Василий Готовцев (“Стайер”) иккис уонна Петр Захаров (Чурапчы) үһүс.
“Ньургун Тимофеев кэриэһигэр ыытыллыбыт кросска киһи үөрэрэ, үгүс спортсмен астыммытын биллэрдэ. Ити курдук, төһө да уустук күн буоллар, киһи бөҕө кэлэн барда. Бэлиэтээн эттэххэ, билигин сүүрүү кэмэ үгэннээн турарынан, республика үрдүнэн сүүрүүгэ күрэхтэһиилэр бөҕө буола тураллар.
Ил Түмэн, улуустааҕы спорт управлениета, улуустааҕы үөрэҕирии управлениета, Нь.С. Тимофеев аатынан РСШОР, “Олимпик” спортивнай оскуола, улуустааҕы чэпчэки атлетика федерацията, Бастакы Хомустаах олохтоох дьаһалтата, Бастакы Хомустаах оскуолата күһүҥҥү кросска күүс-көмө буолбуттарыгар, спонсордаабыттарыгар махтанабыт. Холобура, күһүҥҥү кросска анал бирииһин туруорбут РФ спордун маастара, Саха сирин биэс төгүллээх рекордсмена, Саха норуотун оонньууларын, Манчаары оонньууларын элбэх төгүллээх чемпиона Кузьма Татаринов “наадалаах кэмҥэ өйөөбүтэ” диэн Ньургун Семеновичка махтанар.
Күрэхтэһиигэ бэйэлэрин көрдөрбүттэр. Большошапов Дима 2000 м сүүрэн үчүгэй бириэмэни көрдөрдө. Ветераннарга сүүрбүттэргэ Дмитрий Ловцев, Василий Готовцев күүтүллүбүтүн курдук, бириэмэлэрэ таһыччы. Ону тэҥэ, республика чемпионката, таһымнаах күрэхтэһиилэр призердара, улуустааҕы чэпчэки атлетика федерациятын анал бирииһинэн наҕараадаламмыт Елена Бурнашева бэртээхэй сүүрүүнү көрдөрдө”, – диэн кэпсиир сүрүн судьуйа Клавдия Михайловна.
