Нам улууһун киинигэр, Александр Игнатьев аатынан Эҥсиэли стадиоҥҥа Кыайыы 78 сылыгар аналлаах параад 2 чаас устата барда. Манна улуус тэрилтэлэрэ, общественнай хамсааһыннар, улуус нэһилиэктэрэ кыттыыны ыллылар.
Үөрүүлээх тэрээһиҥҥэ Нам улууһун Аҕа баһылыга Юрий Слепцов, СР тыа хаһаайыстыбатын министрэ Александр Атласов кыттыыны ыллылар.
Киин трибунаҕа Юрий Иннокентьевич Слепцов, Александр Павлович Атласов, улуус депутаттарын Сэбиэтин бэрэссэдээтэлэ Алексей Иванович Винокуров, улуус бэтэрээннэрин Сэбиэтин бэрэссэдээтэлин солбуйааччы Николай Дмитриевич Захаров, Нам улууһун байыаннай комиссарын э.т. Лена Дьяконова, улуус олохтоохторо стадиоҥҥа музыка уонна диктор саҥатынан сэлэлээн хааман киирэр параадтааччылары уруйдуу көрүстүлэр.
Параадка мустубут аҕам саастаах дьону полевой куукунаҕа астаммыт хааһынан, итии үүттээх чэйинэн күндүлээтилэр.
Юрий Слепцов, Алексей Винокуров, Николай Захаров мустубут дьону Кыайыы 78 сылынан
эҕэрдэлээтилэр.
Улуус баһылыга Юрий Иннокентьевич аныгы көлүөнэ Улуу Кыайыы хайдах курдук сыранан кэлбитин умнуохтара суоҕа уонна улууска кэнники дьылҕалара биллибэт саллааттар тустарынан өйдөбүллэри чөлүгэр түһэриигэ көрдүүр үлэлэр өссө да ыытылалларын эттэ. «Бүгүн өһүөннээх күүстэр биһиги дойдубутугар, аан дойдуга барытыгар суоһуур кэмнэригэр байыаннай эпэрээссийэҕэ сылдьар байыастары кытта кэккэ биһиги биир дойдулаахтарбыт кытта сылдьаллар. Биһиги кинилэргэ күүс-көмө тирэх буоларбыт таһынан, таһаарылаах үлэбитинэн-үөрэхпитинэн, биир сомоҕо буолан дойдубут бөҕөргүүрүн, сайдарын туһугар туруулаһыахтаахпыт» – диэтэ.
Кыайыы параадын илии илииттэн ылсан, тоҥолохтон тутуһан икки сиринэн оһуохайдаан түмүктээтилэр.
Ыам ыйын 9 күнэ биһиэхэ мэлдьи ураты бырааһынньык.
Кыайыы күнэ – хас биирдии дьиэ кэргэҥҥэ ытык өйдөбүл.
«Нам улууһа» МТ пресс-сулууспата
