Саха сирин кыһыҥҥы спартакиадатыгар спорт ветерана, Нам улууһун бочуоттаах олохтооҕо Клавдия Шелковникова физическэй култуура уонна спорт Министерствотын ыҥырыытынан ыалдьыт буолар.
— V кыһыҥҥы спартакиаданы 7 спорт ветерана буолан көрө сылдьабыт. Тэрийээччилэр Алдаҥҥа хайыһар баазатыгар олохтоотулар, усулуобуйа үчүгэй. Хайыһардьыттар суолларын көрөн санаам көтөҕүллүбүтэ. Трассаны уонна бэйэбин тургутаары прокаттан хайыһар уларсан хатааһылаатым.
Олох сирэйдиин сырдааммын, дууһалыын чэпчээммин сүүрүөх-көтүөх, үлэлиэх-хамсыах санаам күүһүрэр. Трасса хайа үрдүгэр буолан уһун сыырдары өрө тахсаҕын, түһэҕин. Толору дьарыктаах хайыһардьыт скороһын таһаарарыгар оһуобай трасса эбит.
Күрэхтэһии бастакы күнүгэр классическай көрүҥҥэ дистанция аайы 30-туу хайыһардьыт (кыргыттар, уолаттар, дьахталлар, эр дьон) күрэхтэстэ. Спорт маастара элбээбит. Алдан, Нерюнгри, Дьокуускай куораттар хайыһардьыттара күүстээхтэрэ тута биллэр. Ордук Нам хайыһардьыттара Новгородова Наташаҕа, Эверстов Петяҕа ыалдьан төттөрү-таары хаамыталаатым. Бэйэлэрин кыахтарынан үчүгэйдик күрэхтэстилэр. Күүстээх састааптаах хайыһардьыттарга 10 киһи ахсааныгар бааллар.
Харысхан Попов
