НАМ УЛУУҺУГАР ОҔО СПОРДУН КИИНЭ ҮӨРҮҮЛЭЭХТИК АРЫЛЫННА
Бүгүн, балаҕан ыйын 17 күнүгэр, Нам улууһугар Оҕо спордун сайдыытын декадатын чэрчитинэн эбиэккэ диэри И.Е. Винокуров аат. Намнааҕы педколледж актовай саалатыгар «Роль физической культуры и спорта в образовательных организациях» физкультура учууталларыгар, тренердэргэ, студеннарга аналлаах семинар ыытылынна.
Күнүс 2 чаастан Н.С. Тимофеев аат. республикатааҕы олимпийскай эрэллэри бэлэмниир спортивнай оскуола саалатыгар Нам улууһугар оҕо спордун декадатын стартын биллэрэр үөрүүлээх түгэн буолан ааста.
Тэрээһин күндү ыалдьыттарынан быйыл Парижка ыытыллыбыт Олимпиада кыттыылаахтара Сардана Трофимова, Айаал Лазарев буоллулар.
Оҕо спордун декадата саҕаламмытын туһунан “Нам улууһа” МТ баһылыгын солбуйааччы Юрий Дьяконов биллэрдэ уонна киэн туттар олимпиецтарбытыгар – Нам улууһун кийиитигэр Сардана Трофимоваҕа махтал суругу уонна Хамаҕатта нэһилиэгэр уһаайба анаммытын туһунан туоһу суругу, Айаал Лазаревка махтал суругу уонна Нам улууһун Хомустааҕыттан биллиилээх тимир ууһа Михаил Баишев оҥорбут саха быһаҕын бэлэх уунна.
Бэлиэ түгэн кыттыылаахтарын “Нам улууһа” МТ баһылыгын солбуйааччы Юрий Дьяконов, Ил Түмэн тыа сиригэр уонна аграрнай политикаҕа сис комитетын председателэ Александр Атласов, улуус үөрэҕин управлениетын начальнигын солбуйааччы Светлана Поротова эҕэрдэлээтилэр.
Салгыы улуус үөрэх уонна эбии үөрэхтээһинин тэрилтэлэрин үлэлэрин сүрүннүүр, оҕо-ыччат спордун сайыннарар сыалтан “Нам улууһа” МТ баһылыга Юрий Слепцов 183 №-дээх дьаһалынан 2024 сыл балаҕан ыйын 17 күнүттэн үөрэх управлениетын иһинэн тэриллэр Оҕо спордун киинэ арыллыытын бэлиэ түгэнэ ыытылынна.
Саҥа тэриллиини туоһулуур докумуону улуус баһылыгын солбуйааччы Юрий Дьяконов Оҕо спордун киинин дириэктэригэр Юрий Балаганскайга туттарда. Юрий Балаганскай харда тылыгар улууспутугар Оҕо спордун киинэ арыллан күүстээх, таһаарыылаах үлэ күүтэрин бэлиэтээн эттэ уонна киниэхэ маннык эппиэтинэстээх үлэни итэҕэйбиттэригэр улуус баһылыга Юрий Слепцовка, үөрэх управлениетын начальнигар Мария Игнатьеваҕа махталын тиэртэ.
Улуус баһылыга Юрий Слепцов эҕэрдэ тылыгар оҕо маассабай спордун декадата биллэриллэн, оҕо спордун сайыннарыыга араас тэрээһиннэр ыытыллалларын эттэ. Юрий Слепцов: “Бүгүҥҥү үөрүүлээх күммүтүгэр киэн туттар олимпиецтарбыт, ааттаах-суоллаах спортсменнарбыт Сардана Трофимова, Айаал Лазарев маастар-кылаастары ыытыахтара. Кинилэргэ ис сүрэхпиттэн махталбын тиэрдэбин. Быйыл улууспутугар Оҕо спордун сылынан улахан ситиһиилэр кэллилэр. Ол курдук, “Спортивные Якутяне” республикатааҕы үөрэнээччилэр спартакиадаларыгар 2 миэстэҕэ тахсаммыт, «Азия Оҕолоро» аан дойдутааҕы оонньууларга улууспутуттан 19 спортсмен талыллан кыттан, кыһыл, үрүҥ көмүс, боруонса мэтээллэри аҕалан үөрүүбүт улахан. Нам оҕолоро, Нам ыччата улууспут спордун үрдүк таһымҥа таһаарыахтаахтар, доруобай, чөл олохтоох буолуохтаахтар. Ону ситиһэр инниттэн саҥа тэриллибит Оҕо спордун киинэ, бары бииргэ түмсэн үлэлиэхпит”.
Хамаҕатта нэһилиэгин баһылыга Евгений Ушницкай саха дьоно киэн туттар спортсменнарбытыгар Сардана Трофимоваҕа, Айаал Лазаревка махталын тиэртэ, Оҕо спордун сайыннарыы декадатынан эҕэрдэлээтэ. Улуус салалтатыгар, улуус баһылыгар Юрий Слепцовка, «Олимпик» спортоскуоланы өр сылларга таһаарыылаахтык салайан кэлбит Юрий Балаганскайга оҕо спордун сайыннарыыга улахан кылааттарын иһин махталын тиэртэ уонна Хамаҕатта нэһилиэгин “Эрчим” спортсаалатын баазатыгар үлэлиэхтээх саҥа арыллыбыт улуустааҕы Оҕо спордун киинигэр ситиһиилэри баҕаран туран, эҕэрдэ суругун уонна бэлэҕин Юрий Балаганскайга туттарда.
Айаал Лазарев, ааттаах-суоллаах российскай уонна киргизскэй тустуук, Азия чемпиона уонна хас да төгүллээх призера, аан дойду Куубагын призера, 2023 сыллаах Азия оонньууларын боруонса призера, 2016, 2020, 2024 сс. Олимпиадалар кыттыылааҕа, Кыргызстан спордун үтүөлээх маастара, эҕэрдэ тыла.
Күнүс 3 чаастан А.А. Игнатьев аат. культурнай-спортивнай комплекс манеһыгар биллиилээх российскай-киргизскэй сүүрүк, 2024 с. Парижка ыытыллыбыт Олимпийскай оонньуулар кыттыылааҕа, чэпчэки атлетикаҕа норуоттар икки ардыларынааҕы кылаастаах спорт маастара, марафоҥҥа Россия биэс төгүллээх чемпионката Сардана Трофимова сүүрүү техникатыгар көрдөрбүт маастар-кылааһыгар эдэр сүүрүктэр, физкультура учууталлара, төрөппүттэр, сүүрүүнү сэргээччилэр көхтөөх кыттыыны ыллылар. Улууспут сүүрүүнү сэҥээрээччилэригэр Сардана Трофимова уопутун үллэстэр, ылынар, үөрэнэр ураты сэдэх түгэнэ тосхойдо.
Н.С. Тимофеев аат. республикатааҕы олимпийскай эрэллэри бэлэмниир спортивнай оскуола тустуу саалатыгар Айаал Лазарев маастар-кылааһыгар эдэр тустууктар умсугуйан туран дьарыктаннылар.
Маннык ааттаах-суоллаах спортсменнар кэлиилэрэ улууска чэпчэки атлетиканы уонна тустууну киэҥник тарҕатыыга төһүү күүс буолар, үүнэр көлүөнэни спордунан утумнаахтык дьарыктаныыга көҕүлүүр.
Бу күн Н.С. Тимофеев аат. республикатааҕы олимпийскай эрэллэри бэлэмниир спортивнай оскуола спортивнай былаһааккатыгар оскуола выпускниктара ГТО нуорматын толорууга бэйэлэрин холоннулар.
Бүгүн улууспутугар оҕо спордун сайдыытыгар, оҕону чөл олоххо иитиигэ өссө биир хардыы оҥоһулунна, үрдүк соруктар турдулар.
Инникитин бары биир сомоҕо буоламмыт, ситиһиилэр, кыайыылар кэлэ турдуннар, бүгүҥҥү ыалдьыттарбыт Сардаана Трофимова уонна Айаал Лазарев курдук оҕолорбут Олимпиадаҕа тиийэ кынаттанан сайда турдуннар.
“Нам улууһа” МТ пресс-сулууспата
Сардана Трофимова: “Нам улууһун оҕолоругар маастар-кылаас биэрбиппин олус астынным”.
Христофорова Ксения, Н.С. Тимофеев аат. республикатааҕы олимпийскай эрэллэри бэлэмниир спортивнай оскуола Хатыҥ Арыытааҕы чэпчэки атлетикаҕа филиалын иитиллээччитэ, И.Е. Винокуров аат. Хатыҥ Арыы орто оскуолатын үөрэнээччитэ, Сардаана Трофимова маастар-кылааһын кэнниттэн санаатын атастаһар.
